HKD編輯推介

【大埔出發】好心分手大刀屻

是否很驚訝,講不出說話? 走在大刀屻,真係有機會攰到無聲出。

如果出於一份好心帶愛侶行山,千萬不要輕視它。這山特別高? 非也。此程最高位「大刀屻」只達566米,而「北大刀屻」則有488米;前者比獅子山(495米)高不足100米,後者則與獅子山相若。

出發先! 在大埔墟港鐵站上巴士,嘉道理農場站下車,過對面馬路就上山,而全程最大考驗位置即在於此!

如果一年只行兩三次山、體能又非特別好,敬請留意:「一開波」就勁上斜,上氣不接下氣是常識。欲速則不達,宜「以退為進」,放鬆心情緩步而上,免卻抽筋之苦。

情侶上山,其中一人面青嘔吐,作為路人,我真係見過! 做好心搵節目行個靚山,知己知彼最緊要,搞到另一半詐型、甚至「山系分手」就唔好啦。

作為新手,捱過初段已贏一半!走至山頂部份,四周景觀極開揚,北望雞公嶺、深圳,南臨香港最高峰大帽山,絕對是洗滌心靈好地方。之後有「鐵鍊」伴路,此乃大刀屻打咭位之一,不久即抵第一支標高柱「大刀屻(南)」。

然後沿主路向北推進,到達第二支標高柱「北大刀屻」。路亦開始陰,因多樹蔭,輾轉進入和合石墳場範圍附近…… 只要按路牌指示往粉嶺火車站,路,係唔會行錯嘅。

到達第三支標「箕勒仔」(256米),沿途有多個涼亭,又有道教、神像擺設,極富特色,顯然是個晨運勝地。

最後,可選蝴蝶山或畫眉山方向落粉嶺,兩者路況皆清晰。作為「少行者」,順利完成九公里路,真係要恭喜你,因為成功邁進一個小小「山系里程碑」! (最緊要另一半無詐型)

____________________

路線:大埔墟港鐵站 > 嘉道理農場 > 大刀屻 > 北大刀屻 > 箕勒仔 > 粉嶺華明邨
( 地圖路線 )

山線需時:大約5小時 (hea遊+影相+休息)
____________________

去程交通:
九巴 64K
上車:大埔墟港鐵站 (巴士總站)
落車:嘉道理農場

回程交通:
可步行至粉嶺港鐵站

Facebook專頁:
https://www.facebook.com/hkd.sanyz