文／郭曉婷/135063
本來想要將這段文字拍成影片，令上一代更容易接受，但在這個壓力快要溢滿的晚上，決定先發洩一下。
謹將此文獻給正在拼博的大專生，你在走的路，其實還有很多同路人，你並不孤單。同時希望長輩亦能透過此文，對我們的生活多一點點的認識，我不求你們會感同身受，但求看畢後給予我們一些喘息空間。
六點半，天都未光就起身。明明你今日嘅堂十點先開始，可以訓瞓多陣，但係因為港鐵愈黎愈貴，所以你為左拎嗰張員工八達通，慳返每個月嗰五百蚊車費，星期一至五朝朝七點半著住嗰件壞蛋獎門人制服，叫住「請盡量行入車廂中間」送一車車打工仔返工。完美演繹咗「If you can’t beat them, join them」（註１）呢句話。
只要每日都著果條深色牛仔褲，同黑色平底布鞋出門，搭緊地鐵去開工果陣紮埋個髮髻，返到公司就可以只用兩分鐘換好制服落月台開工，慳落嚟嘅時間就可以每朝瞓多陣。你不禁慨嘆到底幾時先可以著到上星期同Esther一齊買嗰條裙仔返學。
九點鐘，睇住四十五班車離去，嗌完重複又重複嘅口號，你終於可以收工，趕返學校上十點堂。明明你覺得呢堂教嘅野其實你都可以自學，間唔中走一兩次堂都可以追得返，返唔返學同份功課做得好唔好其實冇乜直接關係。但係因為佢點名計分，所以你死死地氣返完工去上。就算你尋日為咗幫組員執手尾，趕埋份功課兩點先瞓。
其實今日咁多嘢做，你覺得應該要食個早餐個腦先郁到。但你諗起上次喺canteen買嗰個三十蚊嘅早晨全餐，食完兩個鐘連堂都未落，又肚餓返，不禁想慳返嗰份你要企半個鐘先有嘅血汗錢。
一上就三個鐘，仲要有啲無聊舉手答問題。你打醒精神睇下有冇邊條易答啲，唔使同精英爭，要確保每堂都答到一條，先有機會拎到嗰十分嘅課堂參與，咁先可以攞返個A range嚟拉一拉自己上個學期比某啲free rider（註２）拉低嘅CGPA（所有學期取得的平均分）。幾辛苦先捱到嗰五分鐘break，可以倒頭大睡叉個快電。
上完堂，諗住可以抖一抖。突然你醒起聽日要交assignment。一份十分。於是，你一邊剪埋條片，一邊等到兩點半南記出下午茶餐，用廿一蚊買碗冇麥記咁熱氣，又平咗兩蚊嘅特價河粉餐。
剪到天昏地暗，夜晚七點幾八點，你又醒起今晚要re-u（註３）。其實你都唔係咁想去，真係啱傾嘅，根本唔使靠呢啲聚會去變成朋友，但係你唔會唔記得上次話唔去嘅阿怡同JoJo係點樣比人話太摺唔合群，所以你又出席了。
食完餐飯，upload完張大家關係睇落好似好close嘅團體相，終於有得返去剪埋條片，十一點半再同groupmates（組員）係skype開完個會。呢一刻，你想俾個腦休息下，開咗電視新聞嚟睇。
睇到新聞講樓價高企，但某富二代勸人睇少場戲同去少次日本就可以解決；睇到新聞講香港人工時全球之冠，但特首仲叫人食晏果陣攞廿分鐘出嚟游水就可以減壓；睇到新聞講政府又唔理民間聲音又唔知為啲大白象燒咗幾多個億（Sorry，呢個要睇網上新聞先睇到），你覺得好無助，開始唔知點解自己要讀書。
望住自己好辛苦先追到嘅3仔，到底俾你拎到4.0咁又點？搵intern（實習），GPA（每個學期各科取得的平均分，滿分為4）只係基本，都唔保證你搵到；搵到份ok嘅intern，又唔保證畢咗業可以返去做；俾你搵到份工，又為萬幾蚊做到隻狗咁；做到隻狗咁，都唔會保證你買到層樓，可以有尊嚴地享有生活嘅空間；就算比你辛辛苦苦儲到層樓，原來政府又可以輕輕鬆鬆地使咗你交嘅稅。
你又望下人哋德國，到底華人社會幾時先可以發展到人哋咁，連做pop-up紙都可以開到個degree，搵到食，而又多人欣賞自己，條條大路通羅馬？對唔住，香港冇呢條路。
你無奈，你憤怒，唔知點算。決定上Facebook或者secrets打個感言，然後你諗起上個月好似加咗個lecturer（講師）同三姑姐做Facebook friends，咁做個社會更加大條道理標籤你呢種大學生做憤青廢青。然後你又諗起啲上一代叫你捱下先識大，唔好咁溫室小花，做人要有希望。係囉，點解以前肯捱下就出到頭、買到樓，而家好似捱到三十歲都未還完grant loan同non-mean（學債），唔好講話儲首期。
有人會話，中學嗰陣朝朝返八點都起到身，要晏晝四點先放學都做到啦，點解入到大學呢啲嘢變到咁難？好簡單，中學唔會唔好意思問屋企拎錢，放咗學唔使返工，搭車唔會遠得去邊（筆者行路返學），啲同學日日見邊有咁多聚會，開支都慳一大筆。上堂可以瞓，功課遲交冇咩大影響，因為所有人最終都只得一份真正嘅功課——DSE。
收起自己擺喺keyboard嗰對手，你望一望份剪咗成日終於剪完，但係臨upload先嚟出唔到高清HD嘅片，你望唔到今晚可以幾點瞓。但係聽日又要溫嚟緊個midterm（期中試），朝早六點半又要起身叫人唔好衝車門，夜晚又要幫個怪獸家長嘅仔補習賺生活費。
你望唔到你人生嘅希望喺邊度。
你望出窗口，開始明點解有人揀咗呢條路。
註１：中文意思是，「如果打不過他們，就加入他們。」
註２：意指不作任何貢獻，打算坐享其成的組員。
註３：全寫為reunion，中文為重聚。現時大學文化的一種，對象甚廣，引用輔仁媒體的說法，「去個交流團要Re，一起趕過報告要Re，同班同學要Re，參加過一些公開表演要Re，總之相聚過，共事過，有空便Re一Re。」
參考文章：
