出稿日期：2018.4.11(星期三)
「中美貿易戰」講到嘴邊，國家主席習近平，在海南博鰲論壇演講，宣布擴大開放措施，包括加強保護知識產權，但無提「美國」兩個字。
美國總統特朗普「留言」感謝，認為習近平在知識產權同技術轉讓的講法開明，中美會共同努力。
之前中國話美國一手挑起貿易衝突，到底美國背後想點?
焦點落喺美國計劃向中國嘅「航空航天技術」產品收多25%關稅，表明針對中國用政策強制要求美國企業
向中國轉移科技同知識財產，因為中國要鞏固「中國製造2025」計劃。呢個「製造強國」路線圖，係國務院三年前推出，希望透過推動高科技產業，在2049年新中國成立一百年，打入世界製造業強國行列。
分析指美國要保住世界一哥地位，唔想中國由「世界加工工廠」轉型為「高科技產業領先國」。
中方就弱點攻擊打「大豆牌」，計劃向美國出口嘅大豆收多25%關稅，皆因中國係美國大豆嘅大客。
美國出口嘅大豆六成都運去中國，但其實中國都好倚賴美國豆，根本好難搵到替代國。
「鬥嘴籌碼」有幾多其實都係睇利益。
美國十大出口大豆州份，八個都係特朗普共和黨票倉，今年11月美國中期選舉，民主黨能否重奪眾議院控制權，將會係「特朗普審判日」。
畢竟選票先係「真・米飯班主」，姑且睇吓中美邊個有「力」笑到最後。
《快閃新聞》
一分鐘單刀直入用「人話」講新聞80.90後角度睇新聞諗生活
⬇︎⬇︎⬇︎
新傳網 http://www.symedialab.org.hk
新傳網FACEBOOK: https://www.facebook.com/symlhk
