新聞敢批 2014-04-09
一週新聞回顧 (1/4-7/4)
主持: 黃子健、陳景瑤
___
[文字稿]一週新聞回顧 (1/4-7/4)
昨日，今日，今日，明日…
子健你做咩自己同自己講嘢喎。
景瑤啊，我搞唔掂呀。
你又有咩問題呀? 朝朝都係咁，好煩呀。
CY上星期無啦啦主動話，政府知道唔少市民不滿旅客太多，會研究「調控旅客人數增長和旅客結構」。
知錯能改，幾好吖。
但明明舊年12月公佈《香港承受及接待旅客能力評估報告》時說，就算2023訪港人數夠一億人，香港都足以應付。佢又講完等於無講過，真係好難捉摸啊!
咁你就有所不知喇，上個月人大委員長張德江主動要求內地部門研究本港旅客接待能力，之後CY就話政府「非常重視」呢個問題喇。
嘩，原來見阿爺一出口就轉軚，做孫嚟講佢真係世界級。
梗係， 佢一年人工成五百萬㗎，緊係要如上屆特首咁講，做好呢份工啦。
點只啊，佢轉軚轉得快之餘，仲放假都放得多過人，佢上任兩年幾平均放咗差唔多14日大假，多過上兩個特首不特止，仲比董伯伯多差唔多一倍啊!
咁而家香港亂過以前咁多，梗係要放假抖下放鬆啦。
放假點會有得抖吖，搭地鐵等車等到頸都長，上到車分分鐘又變沙甸魚。
蘇錦樑話，等多班車可以增加就業機會㗎，你就偉大啲等多陣啦。
等到幾時呀，分分鐘好似真普選咁，等到2046都未有呀。
子健，你咁講就政治不正確呀，2017咪有權選特首囉，你睇，連泛民都決定去上海喇，閂埋門傾傾，就乜都OK啦。
得嗰14個，專門同中央密密酌政改嘅民主黨，都淨係派咗兩個去咋，點會咁快傾掂數。
「有商有量，實現普選」吖嘛，樂觀啲啦。
景瑤…我想問咗好耐喇，點解你今日講嘢咁官腔架?! 我接受唔到呀！
基本法委員會委員饒戈平之前話，內地學者討論過，香港政府如果再唔開始23條立法，中央就要制定國家安全法，有冇23條都咁唔安全，講嘢都係小心啲好。
吓……咁真係要小心啲，你知啦，方丈好小氣㗎！
嘩，好恐怖，我哋都係走先……
撰稿: 黃子健、陳景瑤
