早前香港上演一齣「電視風雲」，一向出位敢言嘅《蘋果日報》全程狙擊無綫電視（TVB），痛罵對方一台獨大，最終逼到TVB嚟個狗急跳牆，向壹傳媒集團落「封殺令」，禁止其集團記者進入電視城採訪。其實，空穴來風未必無因，唔係你TVB咁多年來都唔長進，節目質素每況愈下，人地又點會咬你吖？
事後坊間都對呢場風波議論紛紛，有人恥笑TVB嘅做法「小學雞」，亦有市民話《蘋果》抵死。但另一邊廂，明明應該關注事件嘅傳媒，反而冇乜聲氣。除咗部份立場忠貞報章作出連番抽水之外，其他報章莫講話為《蘋果》講句好說話，就連社論都唔見有乜點提過今次件事，個個好似新任新聞統籌專員馮煒光上身咁：「三個字，不予置評。」
睇到呢度，如果你心入面打算暗罵傳媒「鵪鶉」、袖手旁觀嘅話，咁你就錯喇！其實應該要讚佢地係為市民利益著想至啱。你知啦，如果得罪TVB，以後俾佢封殺埋一份，會少咗新聞出街嘛！
不過諗落，人地TVB堂堂一個「視霸」，向壹傳媒這個「報霸」下封殺令，最絕嘅係可以製造寒蟬效應－一嚟就封殺本地最大印刷媒體集團之一嘅壹傳媒，殺雞儆猴，目的係話俾其他傳媒聽：「嗱，郁我嘅下場就係咁架喇。」無奈依家本地報業發展艱難，日日為盤數而閉翳，唔係份份報紙都可以好似《蘋果》咁，有能力有「吉士」挑戰電視霸權、地產霸權。激嬲呢啲「權貴」，輕則少左幾單採訪，重則冇埋一大筆廣告費，你都咪話唔傷。
TVB集團董事總經理李寶安之前批評《蘋果》做法果時，意氣風發咁話：「如果你有個鄰居成日鬧你、抹黑你，你仲會唔會請佢嚟你屋企探你？」一間用緊大氣電波嘅傳媒機構，居然透過「封殺令」嚟決定咩人可以採訪，啱聽就聽，唔啱聽就「ban」。李生，你講得啱，一台獨大嘅TVB依家真係當正成個傳媒業係自己屋企。
老套都要奉勸各位傳媒同業一句：他朝君體也相同。就算你唔認同《蘋果》嘅作風，但睇住新聞自由同言論自由受到衝擊而唔出聲，咁就真係太冇骨氣喇。正如壹傳媒執行董事葉一堅話齋：「驚佢條毛咩！」
許嘉信
評語：利用時事強化論點有時效性，如: 個個好似新任新聞統籌專員馮煒光上身咁：「三個字，不予置評。」批評將大氣電波變自己屋企也幽默抵死！結論也能貫徹始終。
