事件簿港大罷課

李國章:學生似吸咗毒

香港大學校務委員會主席李國章主持首次會議,會後觸發混亂,事後李國章與港大校長馬斐森召開記者會交代。李國章稱,為一小撮港大學生的行為,代表港大向社會及市民道歉,強調有關行為只是涉及少數人,相信大部分港大學生仍是非常優秀和負責任。他形容學生當晚的做法猶如「暴民」,行為好似「中咗毒、吸咗毒」,點名批評公民黨成員余若薇、梁家傑等人慫恿學生搞事和「擺大學上枱」。

「當晚混亂係完全同校委會無關係,呢個係馮同學自己俾啲假消息同學,跟住公民黨喺出面慫恿啲泛民、學生去暴動,如果你有啲政黨喺後面,我都講埋當晚余若薇在場,梁麗君(指梁麗幗)係梁家傑個intern(實習),長毛(梁國雄)嗰個助理在場,仲有好多泛民嘅人在場,咁呢啲人係咪嚟干預我哋大學,呢啲係咪政治干預呢?」

被問到不即時成立專責小組檢討《大學條例》的原因,李國章說,大學教育資助委員會的報告將於兩個月內公布,即使學生沒有要求,大學亦會成立小組回應報告。他批評港大學生會會長兼校委馮敬恩是「大話精」,違反校委會保密制及向場外學生發放假消息,引致混亂。

李國章強調自己樂意與學生對話,直言當晚學生的行為令他受到要脅和威嚇,「校委會不會直接與學生和教職員做聯絡,要見我的話,一定要經校長,並非在暴動、強迫之下出來見。」

校長馬斐森指去年10月到訪佔領區時,從未感到人身安全受到威脅,「但在前晚的校委會會議卻感到有真正生命威脅」,認為以「暴民統治」一詞形容合理,並指大學有一套既定程序處理學生的紀律問題。他又說,自己的廣東話程度不足以理解示威口號,亦不清楚誰人屬於哪個政黨,強調若李國章指特定人士在場,只能相信他的判斷。

Comment here

This site uses Akismet to reduce spam. Learn how your comment data is processed.